काठमाडौं, श्रावण ३- वर्तमान स्वास्थ्य मन्त्री प्रदिप पौडेललाई लिएर पछिल्लो समय विभिन्न सञ्चार माध्यमहरूमा नकरात्मक समाचारहरूको निरन्तरता बढ्दो छ। देशव्यापी रूपमा फैलिएका यी खबरहरूले मन्त्रीको कार्यकुशलता र नेतृत्व क्षमता माथि ठूलो प्रश्न उठाएको छ। राजनीतिक, प्रशासनिक र जनस्वास्थ्य क्षेत्रमा देखिएका समस्या र ढिलाइका कारण मन्त्री निकम्मा नै भएको भन्ने धारणा व्यापक हुँदै गएको छ।

केही प्रमुख अनलाइन, टेलिभिजन र पत्रपत्रिकाहरूमा मन्त्रीसँग सम्बन्धित समस्याहरू खुलाइएको छ, जसमा स्वास्थ्य क्षेत्रमा भएका अनियमितता, योजना कार्यान्वयनमा देखिएको सुस्ती र जनतालाई प्रभावकारी सेवा नपुग्नु मुख्य रूपमा समावेश छन्। विशेषगरी डेंगु महामारी व्यवस्थापन, औषधि तथा उपकरण खरिदमा देखिएका अनियमितता र सरकारी स्वास्थ्य प्रतिष्ठानहरूमा जनशक्ति व्यवस्थापनमा भएको कमजोरीका खबरहरू राष्ट्रिय मिडियामा व्यापक रूपमा देखिएका छन्।

स्वास्थ्य मन्त्रालयका विभिन्न प्रतिष्ठानहरूमा उपकुलपति पद रिक्त राखेर देखाइएको बेवास्ता र नियुक्तिमा भएको लामो समयसम्मको ढिलाइले पनि मन्त्रीप्रति आलोचना थपेको छ। चार वटा प्रतिष्ठानमा उपकुलपति पद खाली रहँदा ति प्रतिष्ठानहरूको कामकाजमा प्रभाव परेको र निर्णय प्रक्रियामा समस्या भएको उल्लेख गरिएको छ।

यी घटनाहरूले स्वास्थ्य मन्त्रालयको नेतृत्व कमजोर रहेको तस्बिर प्रस्तुत गर्दै आएका छन्। नागरिकहरूबीच स्वास्थ्य सेवाप्रति निराशा र असन्तोष बढ्दो छ भने राजनीतिक दल तथा स्वास्थ्य क्षेत्रमा काम गर्ने कर्मचारीहरूबाट समेत मन्त्रीको आलोचना सुनिन थालेको छ।

विशेषज्ञहरूका अनुसार, मन्त्रीले जिम्मेवारीमा नदेखाएको सक्रियता र प्रभावकारी नेतृत्वको अभावले वर्तमान स्वास्थ्य प्रणालीमा देखिएका समस्याहरू गहिरिँदै गएको हो। यसबाट रोग नियन्त्रण, महामारी व्यवस्थापन र स्वास्थ्य सेवा वितरणमा समस्या आइरहेको बताइएको छ।

मन्त्री पौडेलले यस विषयमा कुनै स्पष्ट जवाफ नदिएको र संवादको कमीले पनि स्थिति थप जटिल बनाएको छ। जनताका समस्या सुन्ने र समाधान गर्ने सट्टा जिम्मेवारीबाट पछि हटेको आरोप लगाइएको छ।

यसैबीच, विपक्षी तथा विभिन्न सामाजिक सञ्जालहरूमा मन्त्रीको कार्यशैलीप्रति तीव्र आलोचना र विरोधका स्वरहरू उठिरहेका छन्। आगामी समयमा मन्त्रीले आफ्नो कमजोरी सुधार्न र जनताको स्वास्थ्य सेवा सुधार्न कस्तो कदम चाल्छन् भन्ने विषयमा सबैको नजर टुंगिएको छ।