दाङ, असार २०- दाङको राप्ती स्वास्थ्य विज्ञान प्रतिष्ठानमा सुत्केरी गराउन आएकी एक युवतीको अप्रत्याशित निधन भएपछि अस्पताल परिसर तनावग्रस्त बनेको छ। शुक्रबार बिहान करिब ४ बजे घोराही उपमहानगरपालिका-१८ की २१ वर्षीया गुड्डी सुनारलाई प्रसूति सेवाका लागि भर्ना गरिएको थियो।
सुरुमा अवस्था सामान्य देखिए पनि दिउँसो १२ बजेतिर अपरेशन गरेर बच्चा जन्माइयो। तर, शल्यक्रियापछि केही घण्टामै सुनारको निधन भयो। यस घटनापछि आफन्तजन आक्रोशित बनेका छन्। उनीहरूले चिकित्सकमाथि लापरवाही गरेको आरोप लगाउँदै अस्पताल परिसरमै विरोध प्रदर्शन गरेका छन्।
मृतकका ससुरा महावीर सुनारले छानबिनको माग गर्दै दोषीमाथि कारबाही र मृतक परिवारलाई क्षतिपूर्ति दिनुपर्ने माग राखेका छन्। साथै, जन्मिएको नवजात शिशुको उचित र निःशुल्क उपचारको व्यवस्था गर्नुपर्ने मागसमेत गरेका छन्। विरोधका क्रममा केही आफन्तले आक्रोश व्यक्त गर्दै अस्पतालका केही चिकित्सकलाई हातपातसमेत गरेका थिए। यसले अस्पतालको सुरक्षामा प्रश्न उठाएको छ भने चिकित्सक तथा स्वास्थ्यकर्मीहरूले घटनालाई गम्भीर रूपमा लिएका छन्।
प्रतिष्ठानका निर्देशक डा. जनार्दन पन्थीका अनुसार, घटनाको विषयमा विस्तृत विवरण संकलन भइरहेको छ। उनले भने, “प्रक्रियागत रूपमा सुत्केरी गराउने क्रममा कुन विधि अपनाइयो भन्ने विषयमा अध्ययन भइरहेको छ। तथ्य बाहिर ल्याउन छानबिनपछि मात्र निष्कर्षमा पुग्न सकिन्छ।” उनका अनुसार, अस्पतालले नियमित प्रक्रिया अपनाएको दाबी गरे पनि निष्पक्षता कायम गर्न आन्तरिक अनुसन्धानको पहल भइरहेको छ।
यो घटनाले स्वास्थ्य संस्थामा सुत्केरी महिलाको सुरक्षा र उपचार प्रक्रियामाथि गम्भीर प्रश्न उठाएको छ। उपचारमा देखिएको अविश्वास, चिकित्सकहरूप्रतिको आक्रोश, र मृतक परिवारको पीडाले स्वास्थ्य सेवा प्रणालीलाई थप उत्तरदायी र पारदर्शी बनाउनु पर्ने सन्देश दिएको छ। घटनाको निष्पक्ष छानबिन र पीडित पक्षलाई न्याय सुनिश्चित गर्नु अब सम्बन्धित निकायको मुख्य जिम्मेवारी हो।
