काठमाण्डौः अन्तराष्ट्रिय मिडवाइफ दिवसको अवसर पारेर मिडवाइफ्री सोसाइटी अफ नेपालले आयोजना गरेको छलफल कार्यक्रममा मातृ तथा नवजात शिशु मृत्युदर घटाउन मिडवाइफको भूमिका महत्वपूर्ण हुने विज्ञहरुले बताएका छन् ।
कार्यक्रममा बोल्दै सोसाइटीकी अध्यक्ष प्राध्यापक गोमा निरौलाले सम्मानजनक प्रसुती तथा मातृ र नवजात शिशु मृत्युदर घटाउन मिडवाइफको भूमिका महत्वपूर्ण हुने भन्दै मिडवाइफ्री शिक्षा तथा जनशक्तिमा ध्यान दिन पर्नेमा जोड दिइन । उनले मिडवाइफ्री सेवा राम्रो भएका देशमा मातृ मृत्युदर असाध्यै कम भएको भन्दै नेपालमा पनि यसम ध्यान दिन सके धेरै आमा र बच्चाको ज्यान जोगाउन सकिने बताइन ।
आमा र बच्चाको लागि स्थानीय निकायका गाउँगाउँसम्म पीसीएल मिडवाइफ पठाउन आवश्यक रहेको र गाउँमा मिडवाइफ पठाउन सके धेरै हदसम्म मातृ मृत्युदर कम गर्न सकिने बताइएको छ । यसैगरी कार्यक्रममा सोसाइटीकी पूर्व अध्यक्ष किरण बज्राचार्यले मिडवाइफले प्रदान गर्ने सेवाको प्रकृतीले गर्दा पर्यावरण मैत्री हुनुपर्ने बताएकी छन ।
नेपालमा सन् २०१६ देखि मिडवाइफ्री शिक्षा सुरु भएको हो । त्यसयता ६६ जना मिडवाइफले लाइसेन्स लिइसकेका छन् । तर सरकारले मिडवाइफको दरवन्दी खुला नगर्दा उनीहरु सरकारी तहमा मिडवाइफका रुपमा प्रवेश गर्न पाएका छैनन् । नेपालमा हाल आएर मिडवाइफ अध्ययन गर्ने जनशक्तिको कमि आउन थालेको छ । लोक सेवा आयोगको दरबन्दी नभई बिज्ञापन नहुने भएकोले यसको महत्व महशुस गर्न छाडेकोले नेपाल सरकार र सम्बन्धित निकायलाई यस तर्फ ध्यान दिन बिज्ञले सुझाव दिएका छन ।
नेपालमा प्रति लाख जिवित जन्ममा १५१ जना महिलाको मृत्यु हुने गरेको छ। यस मृत्युदरलाई घटाउन मिडवाइफको महत्वपूर्ण भुमिका रहने बताइन्छ ।
