काठमाडौँ, २०८२ साउन १२- नेपालको इतिहासमा सबैभन्दा पुरानो र केन्द्रीय विशिष्टिकृत स्वास्थ्य संस्था वीर अस्पतालले आफ्नो १३६ औँ स्थापना दिवस भव्य रूपमा मनाएको छ। विसं १९४६ साल साउन १२ गते तत्कालीन प्रधानमन्त्री श्री ३ वीर शम्शेर जंग बहादुर राणाले स्थापना गरेका वीर अस्पतालले समयसँगै विकास गर्दै देशकै अग्रणी सरकारी स्वास्थ्य केन्द्रको रुपमा स्थान बनाएको छ।
समारोहको उद्घाटनका लागि उपस्थित भएका स्वास्थ्य तथा जनसंख्या मन्त्री प्रदीप पौडेलले अस्पताल सुधारका लागि सरकार पूर्णरूपमा तयार रहेको उल्लेख गरे। उनले वीर अस्पताललाई "देशको स्वास्थ्य क्षेत्रको ऐना" भन्दै यहाँबाट देखिने सेवाको गुणस्तरलाई समग्र स्वास्थ्य प्रणालीसँग जोडेर हेर्नुपर्ने बताए।
सेवामा छरितोपन, शल्यक्रिया समयमै
मन्त्री पौडेलले वीर अस्पतालमा सेवा छिटो, सहज र प्रभावकारी बनाउनका लागि सुधारात्मक कदम चाल्न निर्देशन दिए। उनले विशेषगरी शल्यक्रिया सेवाको पालो तीन महिनाभित्र दिलाउने व्यवस्था गर्न र लाइन व्यवस्थापन सरल बनाउने योजना तत्काल लागू गर्न आग्रह गरे।
“वीर अस्पताल हेरेपछि देशको स्वास्थ्य अवस्था कस्तो छ भन्ने बुझ्न सकिन्छ। त्यसैले यो संस्थालाई हामी सबै मिलेर उदाहरणीय बनाउनुपर्छ,” उनले भने।
साथै, उनले वीर अस्पताललाई आवश्यक पर्ने बजेट तथा स्रोत व्यवस्थापनमा सरकारबाट सहयोग पुग्ने प्रतिबद्धता पनि जनाए।
सीमित स्रोतमा पनि गुणस्तरीय सेवा
चिकित्सा विज्ञान राष्ट्रिय प्रतिष्ठान (निक) का उपकुलपति प्राडा. भुपेन्द्र बस्नेतले वीर अस्पतालले सीमित स्रोत र साधनका बाबजुद पनि दैनिक तीन हजारभन्दा बढी बिरामीलाई सेवा दिइरहेको उल्लेख गरे।
उनका अनुसार अस्पतालले वर्षभरिमा बहिरंग सेवा अन्तर्गत ६ लाख ४७ हजारभन्दा बढी बिरामीलाई सेवा दिएको छ। त्यसैगरी, आकस्मिक कक्षमार्फत ३५ हजारभन्दा बढी बिरामीलाई सेवा दिइएको छ भने २६ हजारभन्दा बढी शल्यक्रिया सम्पन्न भएका छन्।
आगामी योजना: आकासे पुलदेखि अत्याधुनिक उपकरणसम्म
वीर अस्पतालका निर्देशक डा. दिलीप शर्माले संस्थाले आगामी आर्थिक वर्षमा थुप्रै भौतिक र प्राविधिक सुधारको योजना अघि सारेको जानकारी गराए।
उनका अनुसार, पुरानो र नयाँ भवनबीच ‘आकासे पुल’ निर्माण, कुरुवा (हेर्नेवार) घर बनाउने, आकस्मिक शैय्या थप्ने, तथा अत्याधुनिक उपकरण खरिद गर्ने योजना रहेको छ।
“स्वास्थ्य बीमा कार्यक्रम पूर्ण रूपमा कार्यान्वयन भए तापनि बीमा भुक्तानी ढिलाइ हुँदा सेवा प्रवाहमा समस्या आएको छ,” डा. शर्माले बताए। साथै, वीर अस्पताल साघुरो भइरहेकाले दुवाकोटमा बन्ने प्रसारण अस्पताल परियोजना छिटो अघि बढाइदिन मन्त्री समक्ष आग्रह पनि गरिएको थियो।
प्रधानमन्त्रीको अनुपस्थिती
समारोहमा प्रधानमन्त्री केपी शर्मा ओलीलाई प्रमुख अतिथि बनाउने तयारी भए पनि अन्तिम समयमा उनी अनुपस्थित रहेका थिए। तर स्वास्थ्य मन्त्रालय र अन्य सरोकारवाला निकायको उपस्थिति र सहभागिताले कार्यक्रमको औपचारिकता र उद्देश्यलाई सुदृढ बनाएको थियो।
१३६ वर्षको इतिहास बोकेको वीर अस्पताल सुधार र विस्तारको क्रममा अघि बढिरहेको छ। सरकार, प्रशासन र स्वास्थ्यकर्मीहरूको सहकार्यले आगामी दिनमा यो संस्था अझै प्रभावकारी सेवा दिने केन्द्रका रूपमा स्थापित हुने आशा गरिएको छ।
